Ankunft in Hawaii

Aloah

I bin guat aber todmüad in Hawaii akho… dr erscht Flug vu Züri noch Amsterdam isch guat ganga, ussert dass i dr ds Morga verschlofa han… aber min Sitznochbur us Detroit het fründlicherwies drfür gsorgt, dass i wenigstens no öpis ds trinka kriaga… Han sogar könna kli mit ihm schwätza…

Ds Amsterdam isch as den grad witerganga und döt han i den au müassa so froga beantworta… dia wo mi befrogt het, het ds erscht gar nit wella recht glauba, dass i ds Hawaii gohn go englisch lenra… i könni doch schu guat englisch… ;-) Aber nochdem si miar as paar Froga gstellt het, het si sich glaub müassa korrigiara… aber as isch alles guat ganga und si hend mi in Flüger lo…

In dem Flüger han i a u komischa Sitznochbur kha, het immer so as Heftli vu Modeschaua agluagt und het im ganza Flug vu öpa 10 Stund nur as Glace gessa… Hmmm jo nu, am Schluss het er sich den glich no drfür ghalta, mit miar as paar Wort ds wechsla… as het jeda an eigena Bildschirm kha und so het jeda könna luaga was er will… han drei Film gluagt Juno, Message in a bottle und Taxi, dia ander Zit, han i kli gschlofa und Musik glost!

Wo i den in Seattle akho bin, han i wieder müassa zur Passkontrolla und döt hend’s mi wieder usgfrogt… as isch aber ganz an liaba gsi und er het gmeint, i machi ihn ganz trurig, will er nit mit uf Hawaii dörfi… nochdem i mini Finderabdrück und ds Foti gmacht han, han i müassa mis Gepäck hola und grad wieder ufge… denn han i d’Zit über 2 Stund müassa überbrücka… aber us mina Erfahriga vu New York bin i nit in Duty Free ganga, sondern han miar öpis zum Trinka und Essa gholt und han bi mim Gate gwartet…

Dr Flug vu Seattle uf Honolulu isch kli müahsam gsi, sehr unbequem und vor allem u huara kalt…. Han gmeint dia Zit goht und goht nit verbi…

Endlich hawaiianischa Boda unter da Füass kha, han i mi uf ds Suachi noch mim Driver gmacht und noch langem hi und her, hend miar üs den au gfunda… wo er mis Gepäck gseh het, het er gmeint öb i Goldbarra mitgno heg… :-) Dr Diver het ds erscht a Dütschi in d’Residenz Kaimuki tua und ihra alles erklärt und i han solang dörfa warta… Simona, döt hend di anschienend zwei kennt, wo immer döt sind… am einta hesch du a Hip-Hop CD brennt… bisch das würklich du? Wo miar den endlich in miner Resindenz gsi sind, het er au miar alles zeigt und erklärt. I teila ds Bad und Kuchi mit zwei anderna Fraua und jedes Zimmer het an Küahlschrank… noch Mitternacht (Ortszit) bin i den todmüad ins Bett ganga…

Han denkt i schlofa sicher bis weiss nit wenn, aber am 7 bin i schu wieder verwacha… ds Bett isch u weich und drum nit sooo bequem… jetzt han i eigentlich wella Bloq schrieba, aber i weiss dr Code für ds Wireless nit (min Driver hets miar eba gester installiart)… muass drum ihm wohrschinlich hüt schu ds erschta Mol alüta…

Eigentlich han i jo wella mini Schual suacha, damit i morn nüm muass, aber hann si nit gfunda, bin dia Kapiolani Blv. uf und ab glofa... drfür han i ds Ala Moana Shopping Center gfunda und han mi döt kli verwilt... als erschts han i grad müassa in Disney store :-) noch zwei Stund het sich mol min Maga bemerkbar gmacht und i han mi uf da Weg zum nögsta Subway gmacht...

Wo i wieder Hei kho bin, isch grad mini Zimmernochbürin izoga... si isch us Luzern und bliebt für an Monat do! Zum Glück isch grad no dr Driver do gsi und i han ihm könna mis Computer-Problem schildera... leider het er au nit recht gwüsst was macha und het gmeint er kunnt am 4 nomol... i han den öpa zum xta Mol dr Laptop neu gstartet und plötzlich isch as ganga... do sött no eina druskho... jo nu, hauptsach as funktioniart jetzt!

Jetzt mach i no a klini Siesta, am 4 han i schu wieder mit dr Daniela abgmacht...

Ah jo, ds Wetter isch u schön, am Morga hets kei Wolka am Himmel kha, am Nomitag hets den as paar Wolka ge, aber heiss isch as immer gsi..

Morn müand iar den an mi denka, han jo dr Istufigstesst... viellicht klappts jo glich, dass i am Morga Schual han...

I wünscha eu no an guata Wuchaafang und a super Wucha

Liaba Gruass

Kesang

I wünscha eu no a guati Zit und bis ganz bald

Kesang