On the way back home

Nochdem i gester mini sieba Sacha endlich zämmapackt han, sind miar nomol zum Strip führa! Sind no Luxor go bestuna! Isch ech idrücklich was dia do baut hend! Isch echt idrücklich und i weiss fast gar nit wohi mit all dena Idrück... Nocher sind miar gli mol Hei, han jo am 4 schu wieder müassa ufstoh...

Noch mina zwei Stund Schlof, han i mi den au schu müasa vum Roger verabschieda! Er goht jetzt no allei mit am Van bis noch San Francisco...

Dr Shuttlebus het mi sicher zum Flughafa brocht (sogar döt het ma no gönna spiela)! Hmmm und den han i müassa mini Köffera uf d'Woog stella und han grad könna umpacka, dr eint Koffer het 10 Pound ds viel kha!

Dr Flug noch L.A. isch guat ganga und au mis Gepäck isch akho! Wo i us am Flughafa usa kho bin, het mi fast dr Schlag troffa! Tusigi vu Lüt sind umanand gstanda und i bin mina drei Köffera mitten drin! Bin grad kli verlora gsi und i han dia Stadt wieder Mol verfl... Nochdem i den aber X-Mal hi und her glofa bin, han i den min Check-in gfunda! Wo i den endlich mini Köffera "versorg" han, han i bemerkt, dass in mim Handgepäck Wasser usgleert isch und mini Kleider sich violet verfärbt hend! Super, het mi natürlich schön agsch... So und jetz was mach i 5 Stund am Flughafa?! Nei, das han i miar nit wella atua, bin in as Taxi gstiega und dä het mi am Santa Monica Pier usglada! Do's am Pier nit so schön gsi isch und i wieder Mol gfrora han, han i mi uf d'Suachi noch dr Fuassgängerpromenada gmacht! Han döt einsam mini Pasta gessa und han mi nocher an Strossarand gsetzt und am Strossmusiker zuaglost! Zum guata Glück isch er echt dr Hammer gsi! Aber Zit goht halt glich nit so schnell verbi... Denn bin i uf dia glorrichi Idee kho, dass as jo im Starbucks immer Wireless het und tatsächlich han i mi könna ilogga und jetzt sitz i sit ar a Stund im Starbucks und kann im Internet kli Zit vertrieba... Leider isch dr Starbucks im Schatta und i früra wieder mol....

Freu mi eu alli wieder ds gseh!

Bis ganz bald!

KC goes to Vegas

Nochdem i am Dsiestig d'Daniel uf da Flughafa brocht han, han i im Hotelzimmer uf da Roger Dodger wartet, damit miar ds erscht no schnell ds Staples Center könnt go aluaga und den witer Richtig Las Vegas fahra könnt! Schlussendlich sind miar für 15 $ ds Uswärtsspiel vu da Laker uf Grossbildschirm go luaga! Isch eifach dr Hammer gsi und as sind sogar Cheerleader döt gsi... dass het natürlich dr Roger umso me gfreud... ;-) Noch am Spiel sind miar den noch Palm Spring gfahra, hend um Mitternacht as Schlofplätzli gsuacht und hend den grad uf am Parkplatz neb am a Hotelkomplex im Auto gschlofa! Am nögsta Tag hend miar üsi Morgatoiletta im a öffentlicha Park gmacht und hend üs as herzigs Kaffi für da ds Morga gsuacht! Nocher sind miar mit am Seilbähnli wo sich dreht uf an Berg vu ca. 2600m, wo vu Schwizer baut worda isch ufa und hend döt kli dia schön Ussicht gnossa!

Uf am Weg zum Joshua Tree National Park het üs no Polizei aghalta, will sini Markiarig abglofa isch, hend den das aber regla könna! Er het üs aber doch kli usglacha, dass miar mit dem Auto noch Las Vegas wend...
Bi Sunnauntergang sind miar im Joshua Tree National Park akho! Isch wunderschön gsi, ds Subway Sandwich uf am a Stei und bi Sunnauntergang ds essa! Nochdem miar üses Schlofplätzli gfunda hend, hend miar no kli dr Sternahimmel bewunderet und sind den go schlofa! Isch verdammi kalt gsi, han zwei Pullis, zwei Jäckli, an Schal und alli Deckina akha und han trotzdem gfrora! Am nögsta Tag sind miar no kli dia Sehenswürdigkeita im Park abgfahra. Isch echt idrücklich, was d'Natur alles ds büta het! Jo und den isch as au schu los ganga mit dr Fahrt noch Vegas! Hend viar Stund Fahrt vor üs kha! Isch eigentlich erstunlich guat ganga, zietlilang hend miar a Stund keis Auto gseh, bisch eifach ins Nichts gfahra! Aber plötzlich kunnt eifach a riesa Stadt wo alles blingt! Dia Stadt isch eifach unglaublich, isch a Welt für sich! Ma dörf sogar uf da Strossa Alk trinka...
Gester sind miar no Stomp out loud go bestunna! Isch echt a Hammershow gsi, do het sich jeda Füfer glohnt! Nocher sind miar no kli go luaga, was ds Nachtleba so büdet...
So und hüt muass i wieder mini Koffera packa... Flüga morn Morga noch Los Angeles und den gohts am Obig witer in d'SCHWIZ!

Freu mi eu alli wieder ds gseh!

Bis ganz bald!

Glendale Galleria

Hüt hend miar amol richtig usgschlofa, han bis am Mittag pfüsalat... nocher sind miar no kli am Hollywood Blvd. umagschlenderet und den sind miar in d'Glendale Galleria! Ah mega Ikaufscenter! Sött glaub as petit Paris darstella, as het mol so an mini Eiffelturm kha, wo hesch könna mit am Lift ufafahra... Nochdem miar nomol kli ikauft het sind miar den völlig erschöpft mit am Lotti Hei gfahra!

Hüt Obig muass i schu wieder packa! Daniela goht uf New York und i gohn mit am Roger dia letschta Täg uf Las Vegas! Er isch jetzt no in San Diego und kunnt mi morn Morga mit am Büsli go hola! Den luagen miar no ds Stadion vu da Lakers a und den machen miar üs uf da Weg noch Las Vegas! Viellicht knack i jo dr Jackpot und den würd i no as paar Täg ahänga, aber sust kumm i am 2. Juni wieder Hei.... ;-)

Meld mi, sobald i wieder mol Internet han...

hug

Universal Studios

Gester sind miar jo d’Unversal Studios go aluaga! Do hüt Memorial Weekend gsi isch, hend miar recht lang müassa astoh, bis miar endlich hend könna ina goAls erschtes sind miar mit am a Zügli a Rundfahrt durch alli Studios go macha! Hend a „Erdbeba“ und dr King Kong isch au plötzlich us am a Versteck kho (han also schu kli bibbert) Was mega intressant gsi isch, isch ds Viartel vu Desperate Housewifes! Den sind miar no uf Jurasic Park Bahn ganga und au do isch plötzlich an Dino us am Wasser taucht und het di agsprützt und am Schluss sind miar mega durab düset (zum Glück hets nit so gsprützt) und het drbi no as Fötali gmacht!Natürlich sind miar au uf d’Simpsons Ride! Dia isch ganz neu und drum hend miar au ca. 2 Stund müassa astoh! Sind den noch langem mol in as Wägali igstiega und den isch as losganga…. Isch mega toll gmacht gsi, sitzisch nur in dem Waga und as schüttlet kli, aber isch alles 4 D Han zum Teil eifach müassa d’Auga zuamacha, isch so „real“ gsi!
Dia Unversal Studios hend miar recht gfalla, hend üs döt dr ganz Tag verbrocht! Am Obig sind miar den döt no im Buca di Beppo go ds Nacht essa! Isch mega fasziniarend wia das ufbaut isch, as lüchtet überall, so han i miar Los Angeles vorgstellt!

Freakshow @ Venice Beach

Hüt Morga sind miar mit am Lotti zum Roger Dodger gfahra und sind mit ihm zämma an Hafa vu Santa Monica go z’Morga essa!

Nocher sind miar kli am Venice Beach umaglofa! Het also schu ganz komischi Lüt döt! Döt gits sogar as Fitnesscenter am Strand, wo d'Männer da Schaulustiga ihri Müskali zeiga könnt! Het mi döt glaub no könna stundalang verwiela…

Nochdem miar üs den vum Roger verabschiedet het, er goht mit am Auto uf San Diego, kunnt mi am Dsiestig go hola und den göhn miar zämma uf Las Vegas, sind miar zum Griffith Park gfahra und hend vu döt us d’Hollywood Signs. Bestunnt!

Jetzt sind miar grad zruck kho vum Hard Rock Café! Das isch grad bi da Universal Studios! Sind den noch üsam Fajitas no kli umaglofa, isch mega cool döt, het u viel so Schnickschnack-Läda und as het sogar au an A&F ;-)

Morn verbringen miar den dr ganz Tag im Universal Studio – wird sicher mega lustig!

Leider han i do mega schlechti Internetverbindig und kann drum Fötali nit ufalada – sorry!

Los Angeles

Gester sind miar uf dia Mittag Richtig L.A. gfahra. Dr erscht Stopp hend miar am Laguna Beach gmacht! Hend am Strand a klini Pausa gmacht und wo miar zruck khog sind, hend miar doch tatsächlich a Parkbuass kha… Miar hend eba am Afang dia Maschina zum Zahla nit gfunda und dr Hammer isch jo, dass si genau vor üsem Auto gsi wär… Jo nu, ds Lotti het üs den direkt vor da Polizeiposta brocht und hend dia 36 $ zahlt, hend no as Visitakärtli mitgno und sind witer an Newport Beach. Döt hend miar au a klini Pausa igleit und am Strand üses Cola trunka, wo miar nur mit dr ID kriagt hend! Nocher sind miar uf Los Angeles gfahra und ds Lotti het üs sicher in üses Hotel am Hollywood Blv. brocht! Am Obig hend miar eigentlich wella öpis go Essa, aber do miar irgendwia kei guats Resti gfunda hend, sind miar schlussendlich im Pizza Hut glandet… :-( Nit nur Pizza isch grusig gsi, sondern au d’Lüt sind mega unfründlich und strange gsi… Jo nu, sind den tifig wieder zurck in ds Hotel!

Nochdem miar hüt Morga im Jamba Juice ds Morga gessa hend, hend miar üs uf ds Suachi vu da Sternli gmacht! Aber miar hend wit und breit kei Sternli gseh, do hend miar gmerkt, dass miar in dia falsch Richtig glofa sind… Wo miar den bim Walk of fame akho sind, sind miar kli enttüscht gsi! Im Fernseh gseht dass alles viel schöner us! As het zwor überall dia Sterna am Boda kha, aber rund uma hets u grusigi und komischi Läda kha! Aber viellicht isch as aber au ds Wetter gsi, wo alles no düster gmacht het, as het nämlich in Ströma gregnet… Denn hend miar no a Tour mit am a Büsli durch Beverli Hills, Bel Air, Sunset Strip und dr Rodeo Drive gmacht! Miar hend ds Hus vum Beckham, Tomcat, Robbie Williams, Familia Spelling, Rod Stewart, Familia Hilton, Lionel Richie, Jack Nickelson, Julia Roberts (isch glaub ds grösta Hus wo i je gseh han) etc. gseh! Plötzlich isch üs as Auto entgega kho und Daniela und i sind üs sicher gsi, dass as dr Steven Spielberg isch und siehe da, ds Hus isch au grad um dr Ecka gsi! Juppie, han an Star gseh!!!

Am Obig hend miar eigentlich wella mit am Roger vur Schual go essa, aber das het schlussendlich nit klappt, so hend miar denkt, miar göhn eifach schnell öpis go essa und do miar hüt schu bim a guata Mexikaner gsi sind, sind miar nomol zu dem! Leider het dä kei Parkplätz kha, hend den müassa in a Sitagässli go und sind in ds PARKING iboga. Hend den gmerkt, dass miar im Parking vum Hotel Roosevelt Hollywood gsi isch (mind. a 5 Stern Hotel)... Sind den kli verdutzt gsi, dass er üs Tür ufgmacht het zum ds Auto parkiara… Hend den kli verstört dr Schlüssel abge und sind go essa! Daniela het natürlich no müassa ihra Becher vum Fastfood Mexikaner uffülla und so sind miar mit dem Becher zruck üses Auto go abhola! Sind üs kli blöd vorkho, as sind alles so gschniggleti Lüt us ihrna türa Autos usgstiega und miar hend total ungschminkt und mit irgendwelcha Hudla uf üses klina Autali gwartet… Also ma sött nia ungschmikt us am Hus, ma weiss nia wem ma alles begegnet...Was ma nit alles erlebt in dr Stadt vu da Engel… ;-)

Kann irgendwia kei Fotis me ufalada, tuan si jetzt eifach in ds Facebook…

San Diego

Gester Morga sind miar uf La Jolla gfahra und hend d’Seelöwe gsuacht, wo’s do anschienend ha sött! Aber leider hend miar keini gfunda und do’s so kalt gsi isch sind miar in Balboa Park! Daniela het den no zwei Figuara vu dr Niki de Saint Phalle (dr Frau vum Thinguely) entdeckt, do isch grad kli Heimat ufkho…Nochdem miar üsi Fotisession fertig kha hend, sind miar an Seaport Village, grad am Hafa. Döt het’s ganz viel klini herzigi Lädali kha! Wo miar den an eina mit am a A&F Täscha gseh hend, hend miar ihn grad müassa froga, wo dä Lada isch! Do sich usagstellt het, dass er Franzos isch, han i grad mis Französisch uspackt und er het üs dr Weg ins Horton Plaza erklärt! Ds Lotti het üs den sicher in das riesa Ikaufszentrum brocht und miar sind den döt kli go shoppa…Nocher sind miar so kaputti gsi, dass miar direkt Hei sind! Sorry Jacky, aber für ds Mongolisch essa hets nüm glangt! Do miar beidi so müad gsi sind hend miar eigentlich wella öpis in ds Zimmer bstella, aber plötzlich sind miar igschlofa und erst wieder am 9 verwacht, do hend miar halt öpis us am Automat gessa… J

Freezing in San Diego

Gester Obig sind miar, Daniel und i, in San Diego akho! Alli wo no in Hawaii sind, beklagen eu eifach nit, dass as ds Hawaii ds heiss isch, in San Diego isch as u kalt.... Hüt Morga sind miar üses Auto go abhola und sind mit am Lotti (üsas Navisystem) in ds Sea World gfahra! Wo miar üses Billette glöst hend und hend wella ina, hend miar gmerkt, dass miar jetzt würklich in Amerika akho sind, ma het doch tatsächlich müassa an elektronischa Fingerabdruck macha... Nochdem miar üsa Bagel und Croissant kha hend sind miar uf dia 12 d'Orcashow mit am Star dr Shamu go luaga! Isch mega idrücklich gsi! Nocher sind miar uf am direkta Weg an d'Delphineshow. Au d'Seelöwa Show isch mega gsi und ds Walross isch am Schluss eifach us am Bassin usagflutscht und het eifach nüm wella inna, isch mega amüsant gsi! Nochdem miar den alli andera Tiar bestunnt hend, sind miar dr Hilf vum Lotti in dsGaslamp-Viertel. Isch as Viertel wo's vieli klini Restis het und sogar ds Moosse gits döt! Sind den im a mega schöna italienisch Restaurant go essa! Isch mega fein gsi! Nocher sind miar wieder zruck ins Hotel! Isch no mega guat glega und hend drum grad nomol a Nacht buacht und fahren jetzt am Dunnstig uf L.A.

Goodbye Hawaii

So, min letscht Tag in Hawaii isch verbi und mini Koffer sind au schu me oder weniger packt... han fast nit gwüsst wohi mit dem Grümpel... schicka no a riesa Packet Hei, muass glaub morn mit am Taxi uf Post.... :-)

Morn müand miar eba no uf Post und den göhn miar üs no go massiara lo und den müand miar au schu wieder uf ds Taxi zum au rechtzitig am Flughafa ds si... am halb zwei flügen miar ab und sind den am 10 pm ds San Diego!

Noch zwei, drei Täg San Diego fahren miar uf L.A. und verbringen no 5 Täg döt, nocher goht Daniela uf New York und i blieba ds L.A., will i jo vu döt dr Rückflug han!

I kumma am 2. Juni 2008 am 16.35 in Züri a! Freua mi, eu alli wieder ds gseh!

Also bis bald, Aloha!

euri Kesi

Ranch

Am Mittwuch han i an "französischa" Nomitag gmacht! Bin mit zwei Genfer und ar a Französin Richtig North Shore gfahra zum dr planti Ranch macha! Do miar üs aber irgendwia verfahra hend und miar natürlich ober knapp abgfahra sind (bin schliesslich mit Welschla unterwegs gsi) hend miar üsi erscht Aktivität verpasst! So hend miar nur könna mit am Bus durch ds Areal fahra, wo all dia Film dreht worda sind, Pearl Harbor (isch no witzig, im Film flügens gar nit uf Pearl City, sonder genau in dia ander Richtig), George, Jurasic Parc, Godzilla etc. Am meista beidruckt het mi, dass i mi genau an dia Szena vu 50 first dates erinnera mag, wo er si mit am Auto immer wieder abpasst...

Leider hend miar nit könna in d'Fuassstapfa vu da Dinosaurier und vu Godzilla, het mega gära as Foti gmacht! Aber au vum Bus us, hesch as mega guat gseh, isch jo schliesslich au gnuag gross...

So, jetzt gnüss i no mini letschta Täg uf Hawaii, bis am den uf San Diego goht!

Bis bald!

Maui

Am halb 7 am Morga sind miar mit dr Super Ferry uf Maui gfahra! Han schön mini Tröpfli gno und han drum dia ganza 3 Stund gschlofa! In Maui akho, hend miar üses Auto bi Alamo abgholt und do miar so nett usgseh hend, het er üs grad as super Agebot für as Cabrio gmacht! Denn sind miar Richtig Lahaina gfahra, as herigs Fischerdörfli, und sind döt no kli umagwachlet! Am 5 sind miar den uf Wailuku zu üsem North Shore Hostel gange. Isch no mega schön gsi, nur uf a warmi Duschi hesch müassa verzichta, am Obig am 8 isch nur no relativ kalts Wasser ussa kho! Per Zuafall isch no dr Gastbruader vu dr Daniela au no in dem Hostel gsi und sind den alli zämma zum Mexikaner um dr Ecka go ds Nacht essa. Do dr Jöni aber nüm ganz sicher gsi isch, wo dr Mexikaner isch, hend miar ds Auto gno... mit Laufa wären miar glaub schneller gsi ;-) Aber isch mega fein gsi und saubillig! Am nögsta Tag het dr Wecker schu wieder am 5 gschellet zum üsi Snorkelingtour ds macha! Mit am a Schiffli sind miar den Richtig Molokini tuggeret und hend doch tatsächlich no an Buckelwal samt Kind gseh. Han versuacht as Foti ds macha, aber isch miar leider nit so guat glunga dr Wal uf ds Foti ds bringa... As isch ufjedafall mega gsi, dena zwei ds zua luaga! In Molokini akho, hend miar ds Schnorchelzüg agleit und hend könna d'Unterwasserwelt vu Hawaii bewundera! Aber so schön wia in Ägypta isch as halt schu nit gsi! Grusig isch au gsi, dass dia Fisch immer vor diner Brilla hend müassa ihres Gschäft erlediga :-( Wo i den mol überleit han wiaviel Wasser i schu gschluckt han, isch as miar fast schlecht worda! Und wär mi kennt, weiss wia guat i schnorchla kann, gell Tobs ;-) ! Am Nomitag sind miar den uf Hana gfahre, a Art as Hippiedorf, wo unmenga vo Kurva het! Zum Glück hend mini Tröpfli vum Morga no aghebt, sust wär miar glaub bir Autofahrt schu schlecht worda und das wär nit am Fahrer glega...! As isch mega usgstorba döt gsi und sind froh gsi, dass miar doch no as Lädali gfunda hend, wo's Wasser verkaufen! Leider hend miar erst nocher mitkriagt, dass witerhina an wunderschöna Black Sand Beach gsi wär... Am Sunntig sind miar am 3 am Morga abgfahra zuum uf da Haleakala ufadsfahra und dr Sunnaufgang ds bestunna! As isch mega schön gsi, aber arschkalt und das obwohl i mi mega warm agleit han! As het aber au as paar kha, wo mit Shorts und Flip Flop ufa sind... Am Schluss isch leider a riesa Wolka wor dr Sunna gsi! Nocher sind miar ds erscht Mol an warma Kafi go trinka! Am Nomitag sind miar den no in Süda vur Insla duragfahra! Leider han i mini Tröpfli dies Mol nit gno und as isch miar also schu kli schlecht worda! As het glaub no me Kurva kha und do dr Wind hina im Cabrio so fescht blost het, han i müassa abligga... Nocher isch as den schu wieder Zit gsi zum Hei go... bin wieder ohni spückla mit dr Ferry in Honolulu akho...

last day @ GV

Bin letscht Schualtag ar Global Village isch mit gmischta Gfühl gsi! Vor allem bi da Lehrer isch as recht unterschiedlich gsi... dr Kevin het gschwind ciao gsait und me au nit und mit am Mike C. hend miar üs doch no würdig verabschiedet mit Fotis, Umarmiga und am a klina Gschenkli... i glauba er het mega freud kha und isch überrascht gsi, dass miar (Daniela & i) ihm öpis schenken! Ach das isch eifach an so an tolla Lehrer gsi! Vu da Studenta han i mi no nit so würklich verabschiedet, bin jo no a Wucha do und dia meista gseht ma eh alli am "Swiss Army Beach".... Simona, bis i gschnallt han, dass dä gar nit Army Beach heisst, isch as doch no as Willi ganga ;-)

Und jetzt gnüss i eifach dia Schualfreii Zit do in Hawaii! Bin no bis am Mäntig do und den gohts mit dr Daniela ab uf San Diego und L.A. Wird sicher au mega toll!

Graduation & Mai Tai Catamaran

Am Fritig sich as sowit gsi, miar hend üsi Graduation kha! I muass zwor dia Wucha no in d'Schual, aber miar hend glich an dr "grossa" Graduation teil gno! As hend sogar no as paar Schüaler Hula tanzt!

Am 5 isch as den uf da Catamaran ganga! Das Mol hets mega Wella kha und i bin froh gsi, dass mini Tröpfli gnützt hend - danka Edith für da Tipp! Glaub, as isch niamert trocha vu dem Schiff ganga! Entweder bisch vum Meer nass kho oder vum a Getränk... ;-)

Am Obig hend miar den no as BBQ bi miar ir Residenz gmacht und hend no dr Daniela ihra Geburi gfiirt!

Lost

Ds Weekend isch schu wieder verbi und as isch wieder Mäntig...

Am Samstig sind miar mit üsem Jeep noch North Shore und hend üs uf d'Suachi noch da Dreharbeita vu Lost gmacht!

Nochdem miar mit am Jeep über Stock und Stei gfahra sind und üs nur no Autos wo doppelt so viel Profil an da Pneu kha hend entgega kho sind, hend miar glich mol gfunda, miar frogen öpert wo dr Dreh vu Lost isch... Natürlich sind miar viel ds wit gfahra!

Noch langem hi und her, hend miar dr erschti Drehort gfunda... döt isch ds Flugzüg gsi, wo abgstürzt isch und no as paar anderi Requisita! Nocher sind miar no an Beach gfahra und döt isch den dr anderi Drehort gsi! Leider sind ds grad nit am dreha gsi, isch aber glich no interessant gsi zum luaga, wia das so usgseht... ds witzig isch jo, dass dr Beach umge isch, vu seeehr schöna Hüser, also überhaupt nit im Jungle... ;-)

Miar hend sogar as paar Seaturtle gseh, wo im Meer badet hend, leider sind si nit ussa kho, aber isch glich mega herzig gsi!

Am Obig hend miar den no dr schön Sunnauntergang bestunt!

Am Sunntig hend miar den an Strandtag am Waimea Beach gmacht! Isch u gmüatlich gsi, bis as den agfanga het regna... do hend miar den schnell üsi Sacha packt und sind wieder heiwärts!

Kauai

Am Fritig Morge am 9 sind miar vu Honolulu uf Lihue, Kauai gfloge. Dr Flug isch nur ca. a halb Stund ganga, so sind miar schu wieder glandet... Nachdaem miar wieder üsa PT Cruiser gfasst hend sind miar richtig Blowhole im Süda gfahre. Das isch as Loch im Bode und wenn a Wella kunnt, sprüzt ds Wasser wie an Springbrunna us däm Loch usa! Isch mega idrücklich gsi!

Nocher hend miar üs uf da Weg richtig Akaka Falls gmacht... isch mega idrücklich gsi, wia dia zwei Wasserfäll döt aba plätscherend...

Am Samstig sind miar zum Waimea Canyon! Au das isch wieder mega idrücklich gsi... miar hend grad no Glück kha mit am Wetter, as het zwor mängmol recht aba gsaicht, aber für d'Fötali hets immer no glangt... uf da Fötali gseht ma halt dia farbapracht nit so guat wia in Natur...

Noch am a kurza Boxastopp im Subway sind miar au scho witer an da Polihale State Beach Park. Nach dr Fahrt über unteerti Strossa, wo mit am Miatwaga verbota isch sind miar im Paradies akho... as het riesigi Wella kha, do isch dr North Shore grad nüt drgega... as het sogar eina kha, wo döt isch go surfa und er hets echt no im Griff kha... aber go schwimma hesch döt nit könna, d'Strömig isch viel ds stark gsi!

Am Sunntig hend miar eignetlich wella mit am Catamaran zur Na Pali Coast fahre, aber do miar üs im Vorus nit informiart hend, sind miar am falscha Ort gsi... So sind miar halt kli go wandera - Maus, du wärsch echt stolz uf mi! Sind über Stock und (vor allem) Stei glofa und dr Weg isch mega schmol und as goht fast senk ds Loch durab! Noch einahalb Stund hi und ei Stund retour sind miar den aber me oder weniger heil wieder bim Auto akho...

Kauai heisst jo au the garden island und as het dä Nama also au verdiant, isch echt mega grüan, eifach traumhaft... as regnet halt au u viel und in Kauai isch au dr regarichsti Tag... drum sind au fast alli Hüser uf Stelza baut...

Jetzt verstohn i au, wieso so viel Film uf dera Insla dreht worda isch, d'Kulisa uf Kauai für zum Bispiel Jurassic Parc isch eifach perfekt!

So, das wär mis Weekend in Kauai gsi, bin immer no total kaputti, isch alles so idrücklich gsi!

Druck eu ganz fescht!