It's raining cats & dogs

Immer am letschta Fritig im Monat isch am Nomitag Graduation und geg da Obig kann ma uf da Katamaran go! Und do grad as paar vu üsna Kollega dr Abschied kha hend, hend miar denkt miar melden üs au a! Au wenn's miar jo amigs kotzelend goht uf am a Schiff... aber i han vorgsorgt und han schu am Donnstig Tabletta geg Seekrankheit gno und as het gholfa... as isch miar überhaupt nit schlecht worda und i han dia schön Ussicht könna in volla Züg gnüssa... as het nur no dr Wal und d'Delphin gfehlt...

Am Obig hend miar üs den no müassa vu verschidana Lüt verabschieda, vor allem dr Abschied vur Michelle & Marina isch nit ganz eifach gsi!


Do miar alli so müad gsi sind, sind miar am Samstig erst geg da Nomitag an Strand! Ds Wetter isch eh nit super gsi und kli Schlof, het üs allna kli guat tua...

Am Obig sind miar den go thailändisch Essa, amol öpis anders als sust amigs! Ds Essa isch dr hammer gsi und d'Bedianig isch au super gsi! Am Afang hend miar no gmotzt über dia klina Portiona, aber am Schluss hend miar alli müassa kämpfa... Aber do's so guat gsi isch, han i gar nüm wella höra essa... ;-)

Do's am Sunntig au wieder gregnet het, hend miar ir Kaimuki so a richtig usdehnds Früahstück gmacht - mit allem was drzua ghört, sogar mit türem Schwizerkäs (isch leider nit so guat, wia dr echti)! Nochdem miar alli purzelvoll gsi sind, hend miar üs glich mol uf da Weg noch Waikiki gamcht! Tatsächlich het sich den Sunna au no für as Momentli zeigt und hend doch no könna go bada!



Dia Geko Familia isch au no in dr Kaimuki uf Bsuach gsi ;-) Mega herzig nit?! Gekos sind übrigens super, dia essen nämlich d'Kakerlaka...

As isch jetzt Sunntig Obig und as regnet immer no... hoffa, dass jetzt bald wieder besser Wetter wird!

Ah ho, hüt sind no zwei neui Mitbewohnerina kho, zwei Japanerina! Wo dr Jason üs vorgstellt het, hend si nur gsait: ah, oh... so wia alli Japaner do! In dr Schual muass i mi amigs schu kli zämma rissa, dass i nit lacha, wenn wieder mol so as gestöhna us am a Ecka kunnt! :-)

Druck eu alli ganz fescht!