Big Island

Das Weekend han i min erst Usflug uf a anderi Insla gmacht - ds 4 hend miar Big Island unsicher gmacht...

Am Fritig sind miar, dr Michi, dr Fabian, Daniela und i, am 7 am Morga vu Honolulu abgfloge.

Am Flughafa hend miar den üses super Auto an hellblaua PT Cruiser abgholt und sind zum Wasserfall gfahra - isch mega idrücklich gsi, wia ds Wasser vu so wit oba aba plätscheret! Mega schön gsi!

Nocher sind miar zum Mauna Kea ufagfahra. Hend gschwind a Stopp gmacht zum dia warma Kleider alegga und hends den tatsächlich mit üsem super Auto bis noch Oba gschafft!
D'Ussicht vu döt Oba isch Hammer gsi, het zwor kli Wolka gsi, aber das hets grad no so speziell gmacht... Isch irgendwia mega speziell Schnee in Hawaii ds alanga und dr Michi het no versuacht an Schneemaa ds baua, aber as isch ihm den ohni Händscha doch kli ds kalt worda... Dr Fabian het natürlich müassa mit da nackta Füass in Schnee...

Amm Obig sind hent miar den üses Hostel in Hilo bezoga, isch mega herzigs Hostel gsi.

Am Samstig Morga hend miar an Helikopter Flug gmacht... han schu kli schiss kha, will Türa sind offa gsi... Isch mega idrücklich gsi, so über da Vulkan ds flüga! Dr Flug isch ca. 50 Minuta ganga.

Nocher sind miar no gschwind an Black Beach ganga, aber do ds Wetter nit so guat gsi isch, sind miar nur grad a halb Stund gsi - aber ich war dort!

Nocher sind miar uf Kona gfahra, wo üses zweita Hostel gsi isch! Blöd isch nur gsi, dass miar no an andera Maa im Zimmer gha hend! Aber er isch am nögsta Tag recht früah ganga, drum isch as no ok gsi! Kona het miar einiges besser gfalla as Hilo. As isch halt me touristisch, in Hilo hets eifach nüt! In Hilo hend miar natürlich au dr berühamt Kona Kaffi trunka! Weiss gar nit öb ds Kona Velo au vu döt kunnt, Delis?!

Am Obig sind miar den in ds Hard Rock und nocher no in a anderi Bar und an dem Obig isch grad Salsa Obig gsi - han grad müassa an eu denka, Jacky und Corinne! Aber natürlich han i nit tanzt...

Am nögsta Tag hend miar üs den uf d'Suachi noch am a schöna Strand gmacht und noch langem fahra, hend miar den im a so a Resort a Plätzli am Strand gfunda... bin gar nit sicher öb miar döt überhaupt hätten dörfa si, aber as het mol niamer blöd tua!

Leider hend miar nit so lang könna am Strand fulenza, will miar jo no hend müassa zruck uf Hilo fahra... Noch ar a curiosa Taxifahrt bin i den am 10 am Obig totmüad heikho...

d'Fotis kömmen den spöter, sorry!